အတ္တကို ငုံ့ကြည့်ခြင်း

“အတ္တကို ငုံ့ကြည့်ခြင်း”

ဒဏ်ရာအနာတရနဲ့
ကျားတစ်ကောင်ဟာ ငါ
အိပ်မက်တွေအဖျောက်ခံလိုက်ရတဲ့
အိပ်စက်ခြင်းတစ်ခုဟာ ငါ
အဆုံးမသိတဲ့လမ်းတွေမှာ လျှောက်ခဲ့တဲ့
ဖိနပ်တစ်ရံဟာ ငါ
သွေးရူးသွေးတမ်းအော်ဟစ်နေတဲ့
လူသားတစ်ယောက်ဟာ ငါ
မင်းတို့တွေ သေချာမမြင်လိုက်ရတဲ့
မျက်နှာဖုံးတစ်ခုအောက်က မျက်လုံးတစ်စုံဟာ ငါ
ဘောင်တွေ ပညတ်ချက်တွေအောက်က
မွန်းကြပ်နေတဲ့ အသက်ရှူသံခပ်ပြင်းပြင်းတစ်ချက်ဟာ ငါ
ဆူဆူညံညံ အော်ဟစ်နေတဲ့ ပေါက်ကွဲသံစဉ်တွေကြားက
အသံတိတ်စာသားတစ်ကြောင်းဟာ ငါ
ထူးအိမ်သင်သီချင်းတစ်ပုဒ်ထဲကလို
ငါနဲ့ ငါအကြား ဗျာများနေဆဲငါ

ငါဟာ ငါကိုယ်တိုင် မုန်းတီးတဲ့
ငါဟာ ငါကိုယ်တိုင် စက်ဆုပ်တဲ့
ငါဟာ ငါကိုယ်တိုင် ကြည့်မရတဲ့
ငါဟာ ငါကိုယ်တိုင် ရွံရှာတဲ့
ငါဟာ ငါကိုယ်တိုင် စိတ်တိုင်းမကျတဲ့
ငါဟာ ငါကိုယ်တိုင် မဟုတ်တဲ့
ငါဟာ ငါကိုယ်တိုင် ခဏခဏ ပြန်မငုံ့ကြည့်ချင်တဲ့ ငါသာ ဖြစ်တယ်.. ။ ။

ခေလွန်း
မေလ ၁၇ရက် ၂၀၀၇